नेपालवाणी नेटवर्क
जनकपुरधाम, भदौ ।

मधेश प्रदेशले पहिलो पटक प्रदेशभरिका नौं र दशौं तहका कर्मचारीहरुको लागि क्षमता अभिबृद्धि तालिम सञ्चालन गरेको छ । प्रदेश अनुसन्धान तथा प्रशिक्षण केन्द्रले मधेश सरकारको स्थापना कालको ८ वर्षमा पहिलो पटक ३० दिने सेवाकालिन तालिम कार्यक्रम सञ्चालन गरेको हो छ ।

श्रावण १९ गते देखि सञ्चालित तालिममा कर्मचारीहरुको व्यक्तिगत विकास र सार्वजनिक सेवा प्रवाहमा सुधार हुने अपेक्षाका लिईएको छ । मधेशका प्रमुख सचिव मदन भुजेलले औपचारिक तालिमको शुभारम्भ गरेका थिए । उनले नौं र दशौं तहका कर्मचारीहरुलाई आवश्यक सीप, ज्ञान र अनुभव आदान–प्रदान गर्दै प्रदेश प्रशासनलाई सुदृढ बनाउने लक्ष्य राखेको जानकारी दिए । कार्यक्रमको आयोजना पिएलजीएसपी महत्वपूर्ण साझेदारीमा गरिएको हो ।

उद्दघाटन समारोहमा प्रदेश नीति तथा योजना आयोगका उपाध्यक्ष डा. सोहन साहले कार्यक्रमले भविष्यमा प्रदेशभित्र श्रोत व्यक्तिहरुको समूह निर्माण गरी ज्ञान र सीपको साझा सिकाइ, सरकारी कार्यालयहरुको कार्य दक्षता, छरितोपना र प्रभावकारी सेवा प्रवाह सुनिश्चित गर्ने उद्देश्य राखेर सुरु गरिएको जनाए । तालिममा प्रदेशका विभिन्न मन्त्रालय र संस्थाका ३७ जना कर्मचारीहरु सहभागी भएका छन् । पिआरटिसीद्वारा कार्यक्रम मधेश प्रदेशमा पहिलो पटक आयोजना गरिएको हो ।

तालिमका मुख्य विषयवस्तुहरुमा नेतृत्व विकास, आत्म व्यवस्थापन, नैतिकता विकास, अनुभव जन्य सिकाइ, नियमित ज्ञान अद्यावधिक, सन्तुलित नीति निर्माण, व्यावसायिकता, नैतिक र आध्यात्मिक बुद्धिमत्ता, नेतृत्व रणनीति, तनाव व्यवस्थापन, खरिद व्यवस्थापन लगायत समुह कार्य, फिल्ड भ्रमण, केस अध्ययन, अन्तरक्रिया र प्रस्तुति समावेश गरिएको भौतिक पूर्वाधार मन्त्रालयका ईन्जिनियर ओम साहले जानकारी दिए । तालिमले कर्मचारीहरुको क्षमता र कार्यालयको समग्र कार्य दक्षता वृद्धि गर्न सहयोग पुग्ने विश्वास लिईएको छ ।